ខាងក្រោមនេះ ជាសម្រង់នៃសេចក្តីថ្លែងការណ៍របស់លោក William Todd ឯកអគ្គរដ្ឋទូតសហរដ្ឋអាមេរិក នៅថ្ងៃ១០ ធ្នូ ២០១៣
នៅថ្ងៃនេះកាលពី៦៥ឆ្នាំមុន ពិភពលោកបានទទួលស្គាល់នូវសេចក្តីសំរេចជាសកលស្តីពីសិទ្ធិមនុស្ស ដែលថាប្រជាជនទាំងអស់កើតមកមានភាពស្មើគ្នា និងដោយសេរីជាមួយសិទ្ធិមនុស្ស ដែលមិនអាចកាត់ផ្តាច់បាន ដែលក្នុងនោះមានសិទ្ធិសេរីភាពស្តីពីការបញ្ជេញមតិ សេរីភាពនៃការបង្កើតសមាគមន៏ និងសេរីភាពក្នុងការជួបប្រជុំជាដើម។ ទោះបីជាមានការរីកចំរើនយ៉ាងខ្លាំង ស្តីពីការធ្វើអោយប្រសើរឡើងនូវបញ្ហាសិទ្ធិមនុស្ស និងសេរីភាពជាមូលដ្ឋានយ៉ាងណាក្តីនៅជុំវិញភិភពលោក វានៅមានការងារជាច្រើនទៀតដែលត្រូវធ្វើក្នុងការធានាថា ប្រជាជនទាំងអស់មានសេរីភាពដូចដែលបានចែងនៅក្នុងឯកសារដ៏សំខាន់នៃសិទ្ធិមនុស្ស។
នៅក្នុងប្រទេសកម្ពុជាពុំមានអាទិភាពណាសំខាន់សំរាប់សហរដ្ឋអាមេរិកជាងការលើកកំពស់ ការគោរពសិទ្ធិមនុស្ស និងគោលការណ៏នៃលទ្ធិប្រជាធិបតេយ្យនោះឡើយ។ សកម្មភាពដំបូងមួយក្នុងចំណោមសកម្មភាពជាច្រើនរបស់ខ្ញុំ នៅពេលដែលខ្ញុំមកកាន់ការងារជាឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា គឺការបង្កើតក្រុមប្រឹក្សាពិគ្រោះយោបល់ (NGO Advisory Council) ជាមួយតំណាងមកពីអង្គការ ADHOC មជ្ឈមណ្ឌលសិទ្ធិមនុស្សកម្ពុជា អង្គការ LICADHO គណៈកម្មាធិការប្រតិបត្តិកាសំរាប់កម្ពុជា វេទិការអង្គការក្រៅរដ្ឋាភិបាលស្តីពីកម្ពុជា អង្គការសហព័ន្ធពលកម្មកម្ពុជា គណៈកម្មាធិការត្រួតពិនិត្យការបោះឆ្នោតដោយសេរី និងត្រឹមត្រូវ អង្គការ SILAKA អង្គការ Oxfam វិទ្យាស្ថានជាតិប្រជាធិបតេយ្យ វិទ្យាស្ថានសាធារណរដ្ឋអន្តរជាតិ និងអង្គការឃ្លាំមើលសិទ្ធិមនុស្ស។ នៅពេលដែលយើងប្រារព្ធការអបអរទិវាសិទ្ធិមនុស្សនៅឆ្នាំនេះ ខ្ញុំសូមវាយតំលៃនូវភាពក្លាហានរបស់អង្គការសង្គមស៊ីវិលនៅក្នុងប្រទេសកម្ពុជា ទាំងអង្គការក្នុងស្រុក និងអន្តរជាតិ ដែលបានធ្វើការដើម្បីធ្វើអោយប្រសើរ ឡើងនូវសេចក្តីថ្លៃថ្នូរបស់មនុស្សជាតិ និងប្រកាន់ខ្ជាប់នូវទស្សនៈសេរីភាព ភាពស្មើគ្នា និងយុត្តិធម៌នៅក្រោមច្បាប់សំរាប់ទាំងអស់គ្នា។
រាជរដ្ឋាភិបាលកម្ពុជា បានធ្វើការតាំងចិត្តក្នុងការការពារសិទ្ធិមនុស្សដល់ពលរដ្ឋរបស់ខ្លួនតាមរយៈសន្ធិសញ្ញាអន្តរជាតិជាច្រើន ដែលនេះជាការគួអោយកោតសរសើរ។ ការប្រព្រឹត្តិទៅនៃយុទ្ធនាការ និងការបោះឆ្នោតដ៏សកម្ម និងដោយសន្តិភាព ក្នុងអំឡុងពេលនៃការបោះឆ្នោតជាតិកន្លងទៅថ្មីៗនេះ បានបង្ហាញពីភាពប្រសើរនៅក្នុងការគោរពសិទ្ធិស៊ីវិល។ ទោះជាយ៉ាងនេះក្តី ប្រទេសកម្ពុជានៅតែមានការប្រឈមនៅក្នុងបញ្ហាជំលោះដីធ្លី និងការបណ្តេញប្រជាជនចេញពីផ្ទះសំបែង អំពើពុករលួយ និងការរត់ពន្ធមនុស្ស។ ខ្ញុំមានជំនឿថារាជរដ្ឋាភិបាលកម្ពុជា នឹងអាចធ្វើអោយមានការរីកចំរើនជាសំខាន់ចំពោះបញ្ហាដែលមានលក្ខណៈស្មុគ្រស្មាញពិបាកដោះស្រាយរបស់ខ្លួន ដោយធ្វើដៃគូជាមួយសង្គម ស៊ីវិលក្នុងការស្វែងរកដំណោះស្រាយដើម្បីបំរើផលប្រយោជន៏ប្រជាជនជាធំ។
សរដ្ឋអាមេរិកធ្វើការតាំងចិត្តយ៉ាងមុតមាំ ក្នុងការសំរេចបានជោគជ័យនូវការគោរពសិទ្ធិមនុស្ស ដែលមានចែងនៅក្នុងសេចក្តីប្រកាសជាសកលស្តីពីសិទ្ធិមនុស្ស។ ការតាំងចិត្តនេះ បានជុំរុញដោយ គុណតំលៃនៃការបង្កើតប្រទេសរបស់យើងនិងជំនឿដែលថាសន្តិភាពអន្តរជាតិ សន្តិសុខ និងវិបុលសុខត្រូវបានពង្រឹង នៅពេលដែលប្រទេសនានាគោរព និងការពារសិទ្ធិមនុស្ស និងសេរីភាពជាមូលដ្ឋាន។ លោកប្រធានាធិបតីអាមេរិក Obama បានពង្រឹងនូវការតាំងចិត្តនេះតាមរយៈសុន្ទរកថាខាងក្រោម៖
នៅពេលដែលសហរដ្ឋអាមេរិកក្រោកឈរដើម្បីសិទ្ធិមនុស្ស តាមរយៈកិច្ចខិតខំប្រឹងប្រែងនៅក្នុងប្រទេស និងក្រៅប្រទេស យើងចូលរួមជាមួយបុរស ស្ត្រីនៅជុំវិញពិភពលោក ដើម្បីតស៊ូសំរាប់សិទ្ធិក្នុងការបញ្ចេញទស្សនៈ ក្នុងការជ្រើសរើសអ្នកដឹកនាំរបស់គេ និងក្នុងការទទួលបាននូវសេចក្តីថ្លៃថ្នូរ និងការគោរព។ យើងក៏ពង្រឹងផងដែរនូវសន្តិសុខ និងសុខមាលភាពរបស់យើង ពីព្រោះការរំលោភសិទ្ធិមនុស្ស អាចផ្តល់នូវគ្រោះថ្នាក់ជាច្រើននៅលើពិភពលោកដែលយើងកំពុងប្រឈមជាមួយ រាប់តាំងពីជំលោះប្រដាប់អាវុធ និងវិបត្តិមនុស្សធម៌ ដល់អំពើពុករលួយ និងការរីករាលដាលនៃមនោគមវិជ្ជា ដែលនាំទៅរកការស្អប់និងអំពើហិង្សា។ ដូចនេះ នៅក្នុងឱកាសនៃទិវាសិទ្ធិមនុស្ស យើងសូមឧទ្ទិសសាជាថ្មី ទៀតចំពោះខ្លួនយើង ដល់ការធ្វើអោយប្រសើរឡើងនូវការគោរពសិទ្ធិមនុស្ស និងសេរីភាពសំរាប់មនុស្សគ្រប់រូប និងសន្យាប្រកាន់យកនូវឧត្តមគតិដែលយើងលើកកំពស់ពិភពលោក៕
លោក William E. Todd ឯកអគ្គរដ្ឋទូតសហរដ្ឋអាមេរិក
0 comments :
Post a Comment