នៅព្រឹកថ្ងៃព្រហស្បតិ៍ ទី១២ធ្នូនេះ សម្តេចហ៊ុន សែន នាយករដ្ឋមន្ត្រី នៃប្រទេសកម្ពុជាបានដឹកនាំគណៈប្រតិភូមួយក្រុមទៅបំពេញទស្សនកិច្ច នៅប្រទេសជប៉ុន។ ជាដំណើរទស្សនកិច្ចធ្វើឡើងចាប់ពីថ្ងៃទី១២ ដល់ថ្ងៃទី១៧ ខែធ្នូខាងមុខ។
គណៈប្រតិភូកម្ពុជាដែលត្រូវចូលរួម មានរដ្ឋមន្ត្រីក្រសួងការបរទេសកម្ពុជា លោកហោ ណាំហុង លោកស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងសមាជិករាជរដ្ឋាភិបាលជាច្រើនរូបទៀត។
តាមគម្រោងដំណើរបំពេញទស្សនកិច្ចរបស់ប្រមុខរដ្ឋាភិបាលកម្ពុជា និងមន្ត្រីជាន់ខ្ពស់ដទៃទៀតមានដូចជា ពិធីចុះហត្ថលេខារបស់សម្តេច ហ៊ុន សែន ជាមួយសមាភាគីជប៉ុន លោកនាយករដ្ឋមន្ត្រីស៊ីនហ្សូ អាបេ លើឯកសារចំនួន៤។
គម្រោងបន្ទាប់សម្តេចហ៊ុន សែន នឹងចូលរួមកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុនលើក ទី៤០ និងកិច្ចប្រជុំកំពូលមេគង្គជប៉ុនលើកទី៥ នៅទីក្រុងតូក្យូ ប្រទេសជប៉ុនចាប់ពីថ្ងៃទី១២ ដល់ថ្ងៃទី១៤ ខែធ្នូ។
ចំនែកឯគម្រោងមួយទៀត ចាប់ពីថ្ងៃទី១៥ ដល់ថ្ងៃទី១៧ខែធ្នូ នាយករដ្ឋមន្ត្រីហ៊ុន សែន និងលោកជំទាវ នឹងបំពេញទស្សនកិច្ចជាផ្លូវការនៅប្រទេសជប៉ុន ដែលគ្រោងនឹងចូលបង្គំគាល់ព្រះចៅអធិរាជ និងអធិរាជីនីជប៉ុននៅព្រះបរមរាជវាំង។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
គួររំលឹកថា កាលពីថ្ងៃទី១៦ ខែវិច្ឆិកាកន្លងទៅនេះ នាយករដ្ឋមន្ត្រីជប៉ុន លោកស៊ីនហ្សូ អាបេ បានបំពេញទស្សនកិច្ចនៅកម្ពុជាម្តងរួចមកហើយ។ ជាដំណើរទស្សនកិច្ចលើកដំបួងរបស់លោកមកកាន់ប្រទេសកម្ពុជាតាំងពីនាយករដ្ឋមន្ត្រីជប៉ុនរូបនេះឡើងកាន់ដំណែង៕(ដោយៈឆេង សូរិយា)
នៅល្ងាចថ្ងៃទី១៧ ធ្នូ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានវិលត្រឡប់មកដល់កម្ពុជា វិញហើយ បន្ទាប់ពីបានបំពេញទស្សនកិច្ចការងារផ្លូវការនៅទីក្រុងតូក្យូប្រទេសជប៉ុនរួចមក។
បន្ទាប់ពីបានអញ្ជើញទៅកាន់ប្រទេសជប៉ុនចាប់ពីថ្ងៃទី១២ ខែធ្នូឆ្នាំ២០១៣សម្តេចតេជោ ហ៊ុន សែន បាន រួមកិច្ចប្រជុំកំពូលរំលឹកខួបអនុស្សាវរិយ៍គម្រប់៤០ ឆ្នាំ នៃទំនាក់ទំនងដៃគូរអាស៊ានជប៉ុននិង កិច្ចប្រជុំកំពូលមេគង្គ ជប៉ុនលើកទី៥ ដែលប្រព្រឹត្តទៅពីថ្ងៃទី ១២ ដល់ ១៤ ខែ ធ្នូ និងអញ្ជើញបំពេញទស្សនកិច្ចផ្លូវការ ពីថ្ងៃទី១៥ ដល់ ១៧ ខែធ្នូ ឆ្នាំ២០១៣។
ក្នុងរយៈពេលនៃការស្នាក់នៅប្រទេសជប៉ុនគណប្រតិភូជាន់ខ្ពស់រាជរដ្ឋាភិបាលកម្ពុជាដឹកនាំដោយសម្តេច អគ្គមហាសេនាបតីតេជោហ៊ុន សែន បានអនុញ្ញាតឲ្យប្រធានក្រុមហ៊ុនមីនីបៀររបស់ជប៉ុន, ប្រធានក្រុមហ៊ុនមូហីកូ (ក្រុមហ៊ុនរុករកប្រេងជប៉ុន),លោក ម៉ាសាហ៊ីកូ កូមូរា អនុប្រធានគណបក្សប្រជាធិបតេយ្យសេរីនិយមជប៉ុនដែល ជាគណបក្សកំពុងកាន់អំណាចចូលជួបសំដែងការគួរសម ។ ជាមួយនេះសម្តេចតេជោ ហ៊ុន សែន បានអញ្ជើញ ចូលរួមពិធីពិសារតែដែលរៀបចំឡើងដោយព្រះចៅអធិរាជជប៉ុននៅក្នុងព្រះបរមរាជវាំង ។
សម្តេចតេជោ ហ៊ុន សែន និង ប្រតិភូបានអញ្ជើញចូលរួមកិច្ចប្រជុំកំពូលរំលឹកខួបអនុស្សាវរិយគម្រប់ ៤០ ឆ្នាំនៃទំនាក់ទំនងដៃគូរអាស៊ានជប៉ុននិងអញ្ជើញចូលរួមកិច្ចប្រជុំកំពូលមេគង្គជប៉ុនលើកទី៥ ។ នៅព្រឹកថ្ងៃទី ១៥ ធ្នូ គឺជាដំណើរទស្សនៈកិច្ចផ្លូវការ សម្តេចតេជោ ហ៊ុន សែន បានអនុញ្ញាតឲ្យសមគម មិត្តភាពជប៉ុន កម្ពុជា ចូលជួបសំដែងការគួរសម និង បានជួបចរចាទ្វេរភាគីជាមួយលោកនាយករដ្ឋមន្ត្រីជប៉ុន ស៊ីនហ្សូអាបេ។ ក្រោយកិច្ចចរចានោះមានពិធីចុះហត្ថលេខាលើឯកសារចំនួន ៤ រួមមានលិខិតប្តូរសារស្តីពីគម្រោងកែលម្អផ្លូវជាតិលេខ១, លិខិតប្តូរសារស្តីពីគម្រោងធ្វើឲ្យប្រសើរឡើង នូវមន្ទីរពេទ្យបង្អែកខេត្តព្រះសីហនុ, លិខិតប្តូរសារស្តីពីគម្រោងកែលម្អសម្ភារសម្រាប់ការជួសជុលស្ពានហាលខាងលិចនៃប្រាសាទអង្គរវត្ត និងអនុស្សារណៈស្តីពីការផ្លាស់ប្តូរនិងកិច្ចសហប្រតិបត្តិការយោធារវាងក្រសួងការពារជាតិជប៉ុននិងក្រសួងការពារជាតិកម្ពុជា។
នៅថ្ងៃទី ១៦ ខែ ធ្នូ សម្តេចតេជោ និង អញ្ជើញទស្សនៈកិច្ចនៅទីក្រុងក្យូតូ ប្រទេសជប៉ុន ហើយនៅទីនោះ សម្តេចតេជោ ហ៊ុន សែន និង អញ្ជើញទស្សនាតំបន់ប្រវត្តិសាស្ត្រជាបេតិកភណ្ឌវប្បធ៍មសំបូរបែបរបស់ជប៉ុន ។ បន្ទាប់មកសម្តេចនិងចូលរួមក្នុងពិធីស្វាគមន៍ដែលរៀបចំឡើងដោយលោកអភិបាលខេត្តក្យូតូ។
នៅថ្ងៃទី ១៧ ខែ ធ្នូ សម្តេចតេជោ ហ៊ុន សែន និង ប្រតិភូ មុនធ្វើមាតុភូមិនិវត្តន៍មកកាន់មាតុភូមិវិញ និង ធ្វើទស្សនៈកិច្ចនៅវាំងចាស់របស់ជប៉ុន ។ ប្រតិភូនិងវិលត្រឡប់មកដល់ទីក្រុងភ្នំពេញវិញនៅវេលាម៉ោង ៥ និង ១០ នាទីល្ងាច៕
0 comments :
Post a Comment